माघ १३, २०७९ शुक्रबार । January 28, 2023

साकुरा मल्टि मिडिया हाउस द्वारा संचालित

साओ पाउलो । ब्राजिलियन महान् फुटबल खेलाडी पेलेको क्यान्सर बढेको चिकित्सकले बताएका छन् । विगत तीनसाता यता ८२ वर्षीय पेलेको हाल साओ पाउलोस्थित अस्पतालमा उपचार भइरहेको छ ।

अस्पतालकाअनुसार हाल पेलेको क्यान्सरमा वृद्धि भएको र किड्नी तथा हृदय रोग सम्बन्धी थप हेरचाह आवश्यक रहेको छ। पेलेकी छोरीले सामाजिक सञ्जल मार्फत घरमा क्रिस्मस बनाउने योजना तत्कालका लागि रद्द भएको र अब अस्पतालमै समय बिताउने उल्लेख गरेकी छन् ।

सन् २०२१ सेप्टेम्बर यता पेले क्यान्सर रोगसँग लडिरहेका छन् । उनको शल्यक्रियामार्फत आन्द्रामा रहेको ट्युमर फालिएको थियो ।

स्वास्थ्यमा समस्या आएपछि पेले सार्वजनिक कार्यक्रमहरुमा एकदमै कम देखिन थालेका छन् ।

विश्व फुटबल महान् खेलाडी पेले तीनपटक विश्वकप जित्ने अहिलेसम्मका एक मात्र खेलाडी हुन् । उनले सन् १९५८, १९६२ र १९७० मा ब्राजिललाई विश्वकप जिताएका थिए ।

लगातार दुई विश्वकप जित्ने ब्राजिलको कीर्तिमान ६० वर्षसम्म कसैले तोड्न सकेको छैन । कतार विश्वकपमा फ्रान्सका लागि त्यो अवसर थियो । तर फाइनलमा अर्जेन्टिनासँग पराजित हुन पुग्यो । पेलेले ब्राजिलका लागि ९२ खेलमा ७७ गोल गरेका छन् । कतारमा नेइमारले उनको कीर्तिमान बराबर गरेका थिए । ब्राजिल भने क्वाटरफाइनलमा क्रोएसियासँग पराजित भएको थियो ।

©2023 sakurakhabar.com All rights reserved. | Website by Appharu.com